Puisi lan Satua Bali

Kembang desa

Sekadi bunga ne nedeng kembang

Miik ngalub maimpugan

Ngawinang paling ya I kumbang

Setata dot  magarang

Keto masih ne I balang

Uyang paling punyah

Serasa neket ring pabaan

Setata  kainget miik manisne I bunga

Bibit tresna ne jani mentik mabunga-bunga

Mangembang ngasriang jagat

Punika wantah rasa sane kapertama

Dumogi prasida katerima

Tresna matilar

Kari neket bungkung ring jeriji

Bukti tresnan beli sane sujati

Karikeh inget adi

Kapining janji iraga sane pinih suci

Sekat kapertama beli nepukin adi

Kenyem manis adine ngejerang tangkah beli

Nadak beli jatuh tresna ring hati

Uyang paling setata inget ken adi

Adi jegeg sekadi dewi

Sane banget kayasangin

Nguda adi ngalahin dewek beli

Serasa setengah mati ragan beline jani

Mogi adi sida nemu tresna sane sujati

Ulian punyah

Punyah...

Kone ngae hati liang

Kerasa ngindang ring ambara

Tuara inget ken raga

Yening punyah...

Tan sida malaksana melah

Beneh pelihe asah

Satata nigtig tangkah

Ngapak-apak nyapa kadi aku

Ulian punyah....

Tresnane matilar

Kalain nyama lan rerama

Manahe tuara dadi melah

Awanannye suud mamunyah

Olih : Agus Darmayasa